حبوبه
نتح الحنين جواى..طرانى حلتنا
زمن الجمال والخير..أيام مسرتنا
شجر العشر والنيم..المالى سكتنا
صوت الصفق والريح..وأغنام زريبتنا
ضل الضحى الممحوق..وكبابى جبنتنا
الضحكه والترحاب..وبواقى ونستنا
والوقفه جمب الباب..لى ناس معزتنا
عايشين على الموجود...حابين بساطتنا
يوم كنا متكاتفين..و(الجد) منارتنا
والقمره عز الليل..ضوّت رتينتنا
نسمة دعاش الصيف..وريحة زلابيتنا
أمى بتسوى الشاى و (حبوبه ) حجّتنا
وهسع بقت فى الدار...(يا ويح نخوتنا )
وشكراً لأهل الدار..الداروا سوءتنا
****
حبوبه وينك وين؟...حبوبه والله زمان...
كاتلنى شوقاً ليك...ولى حضنك الدفيان
منك عرفنا دروس..وروينا ريد وحنان
بى توبك المعطون..غتيتى كل بردان
ودعيتى بالتوفيق..وحصنتنى بالمنان
عفواً..ملانا غرور ونسينا كل الكان
لا فهمنا درس البر..لا قيمة الإحسان
وعرفتى درب الدار...وضاع مننا العنوان
****
(حبوبه)...زورينى..انا داير أحجيكى
بى قصة الأحفاد..الخانوا ماضيكى
صغرت مروءتنا..وكبرت مآ سيكى
لا سدّ جوعك حن...لا لهفه ترويكى
لاهين ورا الدنيا..ومرات كده نجيكى
لا بنفهم أحزانك..لا بندرى بالفيكى
ولو يوم ظلمناكى...عدل الله راجيكى
****
الغول ختف فاطنه..وما فينا اى حسن
ملينا من عجزك...فتشنا ليكى سكن
وكل ما يطول عمرك...حتشوفى ياما محن
إمكن نزورك يوم..لو مره بس أمكن
لو سنحت الأحوال...ولقينا باقى زمن
بعناكى للمجهول...وقبالا بعنا وطن
****
الجاب ابوهو الدار...ما عندوا اى عزر
مهما يكون ظرفوا...لو حتى ضاق المر
معقوله يستغنى..عن والدو مرّه بشر؟؟
الجابو للدنيا ...وعليهو ياما صبر؟
كان راجى يبقى سند...لو شاخ وعدّ عمر
لا راجى جاه لا مال..ولاراجى حتى شكر
داير شويةحب...والذكرى ديمه تمر
عن حالنا نحن زمان..اطفال صغار وشتر
نضحك بدون تكليف..وللهم براهو يجر
علشان يعيش مستور..ويلبى كل أمر
والليله جينا خلاص..لى عهدوا نتنكر؟
نرميهوا جوه الدار..والقسوه تتفجر؟
لا رحمه..لا عرفان..لا نخاف ولا نخجل؟
من ربنا الديان...الوصى يوت بالبر
بالوالد المسكين..العشموا كان أخضر
لكن جفا الحبان..من عشموا كان اكبر
وبقت الحكايه جحود...وامكن تكون أكتر
منعول ولادة الهم...لى والدوا ما قدر
والدنيا بكره تدور...وفى الدار دى يتحكر
*****
ضاقت بيوت العز...ووسعت مآوينا
الحزن ماليكم....والزهو مالينا
ما نسيتوا عشرتنا...لكننا نسينا
بارينا درب الغى...وانكرنا ماضينا
حبوبه تاج الراس...نرجوك تسامحينا
وإنشالله داركم يوم...ترحم وتأوينا
****
دار الحكومه بقت..اخر المطاف بيتكم
فيها بتقيموا الليل ...وتصابحوا يوم عيدكم
الدمعه صحبتكم.. والخوف اكيد سيدكم
وفى منتدى التغريب ..دايماً مواعيدكم
ضيعنا أحلامكم..تاجرنا بى ريدكم
****
حبوبه جوّه الدار..محزونه مكلومه
والدار دى فى الاحزان يكمل عديل يوما
تستقبل الافواج..لا قعده لا قومه
تفتح مع الأذان..قبال تتم نوما
محتاجه رحمه ونور..متجدده همومه
من الفرح والحب..يوماتى محرومه
لازم نساعدالدار...وتعفينا من لوما
معقوله حتى البر...ملزومه بى حكومه؟؟؟
الشاعرة / داليا الياس
