انتظار

إستنيتك جنب أحزاني
جنب الندم الهد كياني
جوَّه السجن الضيع عمري،
ومع سجاني
ورغم الألم الحاصر أملي..
كنت بتطلع من أحلامي
ومن أشواقي.. ومن أشجاني
وكنت بحسك في آهاتي..
وفي كلماتي.. وفي ألحاني
وإنت بتشبه لون الحكمة..
صوتك عالي.. وشكلك تاني
حبك وضَّح شكل الصورة..
وأدَّى قصائد شعري معاني
رجّع لي إحساس الإلفة..
وطعم اللهفة
ورسم البهجة بكل ألواني
معاك إنداحت فكره لبكره..
وصِحي جواي إحساس
إنساني
وبيك إلتأم الجرح النازف..
يا الشديت عصبي الجواني
وفيك كتبت جميع أشعاري..
وليك بذلت هواي وحناني
وأصل القصة البينك وبيني
إرادة وقسمة.. ونور رباني
إله الكون العادل ومنصف..
حقق لي بي جيتك أماني
ونفخ الصور في قبر إحساسي
الكان مدفون في الغربة يعاني
وشاء المولى أشوفك صدفة
وتغسل بالتحنان أدراني
تضوِّي الكون بي بسمة عريضة
وتسكن من يوم داك خِباني
فشكراً يا تعويذة سعدي
على الإخلاص الفاض ورواني
وعلى ترتيبك لي أيامي..
ورجعة نوماً كان جافاني
وكل الريد البدد خوفي
وكل الحب الضم حواني


الشاعرة / داليا الياس